Vedtekter for Stiftinga Nasjonalt Landstadsenter

Vedtatt på stiftingsmøte i Landstadrommet, Seljord prestegard, 31.08.08

§ 1. Føremål
Stiftinga Nasjonalt Landstadsenter har til føremål å ta vare på og vidareutvikle, aktualisere og formidle den kultur- og kyrkjehistoriske arven etter personen, presten, salmediktaren og folkeminnesamlaren Magnus Brostrup Landstad. 

Senteret kan òg arbeide med andre kulturelle uttrykk og tradisjonar med relasjon til Landstad si verksemd.

§ 2. Bygg og anlegg i stiftinga
Stiftinga vil søke om å nytte Seljord prestegard for der å lokalisere Landstadsenteret.

Førebels lokale annan stad kan nyttast i ein overgangsperiode.

§ 3. Kapitalen i stiftinga
Stiftinga Nasjonalt Landstadsenter er stifta av representantar for Den norske Kyrkja, Seljord kommune, Høgskulen i Telemark og Vest-Telemark Museum, samt ei gruppe privatpersonar.

Stiftinga har ein grunnkapital på kr.100.000,-

Grunnkapitalen kan bli utvida ved gåver, testamentariske disposisjonar og andre overføringar av pengar, verdipapir, fast eigedom og lausøyre. Kapitalen vert forvalta av styret. Styret skal i kvart ein skild tilfelle vurdere om det er forsvarleg å utvide grunnkapitalen.
Avkastninga av grunnkapitalen vert nytta i samsvar med føremålet for stiftinga, eller lagt til grunnkapitalen.

§ 4. Styringsorgan
Stiftinga vert forvalta av eit styre på fem personar, vald av representantskapet jfr.§5. Det velgast òg to varamedlemer.
Det fyrste styret velgast av stiftingsmøtet. Styremedlemmene velgast for to år.

Fyrste gong vert to av styremedlemane og eit av varamedlemene valde for eit år. Det er høve til attval.
Styret er det øvste organet i stiftinga.
Styret konstituerer seg sjølv og vel leiar og nestleiar med funksjonstid eit år. Styret kan ta avgjerder når minst tre medlemer  - inkludert styreleiar eller nestleiar - er til stades.

Leiaren, saman med eit styremedlem, kan forplikte stiftinga.

Avgjerder i styret vert gjort med vanleg fleirtal. Ved likt røystetal har leiaren dobbeltrøyst.
Det vert ført protokoll frå styremøta.
Referat frå styremøta vert sende ut til medlemene i representantskapet.

§ 5. Representantskap
Representantskapet skal sikre stiftinga ei brei nasjonal kyrkjeleg og kulturfagleg forankring. Til representantskapet kan velgast representantar frå offentlege, kyrkjelege, kulturfaglege og pedagogiske instansar, samt frå Landstadsenterets støttegruppe/Landstadsenterets venner/Landstadsenterets nettverk.

Representantskapet skal ha mellom 10 og 30 medlemer. Styret avgjer kven som har høve til å utnemne medlemar i representantskapet.
Medlemane i styret har tale- og forslagsrett, men ikkje røysterett i representantskapet.

Representantskapsmedlemene vert valde for eit år om gongen.
Representantskapsmøtet vert leia av ein møteleiar vald mellom dei som har røysterett.

Representantskapet vert kalla inn årleg, og innkallinga må vere skriftleg med minst 4 vekers varsel. Innkallinga skal innehalde sakliste, årsmelding med rekneskap frå styret og budsjett/driftsplan for komande år. I desse sakene kan representantskapet gje uttale.

Ekstraordinært representantskapsmøte vert halde når fleirtalet i styret eller minst 1/3 av medlemene i representantskapet krev det. Innkallinga skal vere skriftleg, og med minst 14 dagars varsel. Ekstraordinært representantskapsmøte kan bare gjere gyldige vedtak i saker som er på saklista. 

Representantskapet er vedtaksført når minst halvparten av dei som har røysterett er til stades. Avgjerder vert gjort med vanleg fleirtal. Ved likt røystetal har møteleiaren dobbeltrøyst. 

Medlemane av representantskapet kan velgjast til styret, men dei må då gå ut av representantskapet i styreperioden.

Representantskapsmøtet vel ein valkomitè på 3 medlemer som kjem
med framlegg på styremedlemer.

§ 6. Representantskapet sine oppgåver 
Representantskapet skal velge styre.

Representantskapet kan gje uttale om årsmeldinga frå styret, rekneskapen frå siste år og budsjett og driftsplan.

Representantskapet kan i tillegg gje uttale til styret i saker representantskapet sjølv ønskjer.
Representantskapet fastset eventuell godtgjering til styremedlemene.

§ 7. Revisor
Styret vel revisor. Revisor må vere registrert eller statsautorisert.

§ 8. Dagleg drift
Styret kan engasjere dagleg leiar. Denne har ansvaret for at drifta av stiftinga er i samsvar med dei rammene og retningslinene som styret gjer vedtak om.

§ 9. Endring av vedtektene
Styret har generelt mynde til å vedta vedtektsendringar.
Representantskapet kan kome med framlegg til vedtektsendringar.
Framlegg til endring av vedtektene krev minst 2/3 fleirtal mellom dei frammøtte på ordinært representantskapsmøte. Dei frammøtte må utgjere minst 2/3 av talet på godkjende delegatar.

§ 10. Omdanning/oppløysing av stiftinga
Framlegg om omdanning/oppløysing av stiftinga fremjast i samsvar med gjeldande lov og regelverk for stiftingar.
Eventuelle midlar ved oppløysing vert disponert av styret, med naudsynt godkjenning frå Stiftingsstilsynet.

§ 11. Godkjenning av vedtektene
Vedtekter og endringar av vedtektene vert sendt til Stiftingstilsynet for godkjenning.